Japanske lâner wer wekker nei iiskâlde moannenacht

maart 28, 2024 09:21

De lâner dy’t Japan ein jannewaris op ’e moanne sette, hat syn twadde moannenacht ek trochstien. De lâner SLIM hat nije bylden nei ierde stjoerd, hat it Japanske romtefeartprogramma witte litten.

Boarne: JAXA

De iiskâlde moannenacht, dêr’t de temperatuer sa’n 130 graden ûnder nul yn sakket, duorret twa wike. Yn dy lange nacht wie it gebiet dêr’t SLIM yn stiet folslein tsjuster. It wie foar de lâning yn jannewaris net dúdlik oft it romtereau de lange kâlde nacht oerlibje soe. Yn febrewaris bliek dat wol sa te wêzen. De Japanners koene net earder kontrolearje oft de twadde nacht ek goed trochstien wie, om’t de lâner himsels útskeakelet as it tsjuster is.

Japan is it fyfde lân dat in lâner goed op ’e moanne set hat. SLIM docht ûnder mear ûndersyk nei de moannekoarst en nei de gearstalling fan rotsen op it oerflak. Dy kinne mooglik wat oer it ûntstean fan de moanne sizze. Nei de presyzjelâning op 19 jannewaris wie it efkes de fraach oft SLIM wol funksjonearje koe, om’t de sinnepanielen net goed wurken. Letter die bliken dat de lâner op syn kant telâne kommen wie, sadat de panielen minder ljocht opfongen. Doe’t SLIM wol wer sinneljocht opfange koe, slagge it om foto’s nei ierde troch te stjoeren.

Lês ek dizze berjochten fan It Nijs:

www.itnijs.frl/2024/01/japan-parkearret-moannelaner-op-moanne-sinnepanielen-wurkje-net
www.itnijs.frl/2024/01/japanske-moannelaner-docht-it-wer-nei-problemen-mei-stroomfoarsjenning

maart 28, 2024 09:21
Skriuw in reaksje

Gjin opmerkingen

Noch gjin opmerkings

Der binne noch gjin opmerkingen, mar jo kinne de earste wêze

Skriuw in reaksje
Sjoch opmerkingen

Skriuw in reaksje

Skriuw in reaksje

This site uses Akismet to reduce spam. Learn how your comment data is processed.