Steatefraksje FNP ropt kolleezje op om garnalefiskers te helpen

De garnalefiskers binne har ried te’n ein. Tonnen hawwe se ynvestearre yn it ferduorsumjen fan harren skippen en no driigje se nei 1 oktober gjin fergunning foar it fiskjen te hawwen. In kafkaeske situaasje! De FNP-Steatefraksje wol dat it kolleezje fan Deputearre Steaten der alles oan docht om dat sa gau mooglik te ferhelpen.

Foto Nationaal archief. boarne Wikipedia Commons. CC0

De fiskerij is in wichtige ekonomyske sektor foar de regio. Dy soarget foar in soad bedriuwichheid, ek op de fêste wâl, en is dêrmei fan grut belang foar de mienskip. Dat de garnalefiskers it no sa dreech hawwe komt trochdat de ryksoerheid harren oan de iene kant in goede takomst foarhâldt, mar harren oan de oare kant stikke lit.

Neffens FNP-Steatelid Dinie Visser moat it net foarkomme kinne dat alle partijen sizze dat it wichtich is om yn duorsumens te ynvestearjen en dat de oerheid it dan, as it derop oankomt, ôfwitte lit. De fiskers, dy’t op oanstean fan it ministearje ynvestearre hawwe, meie net de dupe wurde fan Haachsk treuzeljen by it ferlienen fan de nije fergunning.

De Steatefraksje wol dat it kolleezje fan Deputearre Steaten him foar de garnalefiskers ynset en yn oerlis  mei De Haach giet. Der moat sa gau mooglik in oplossing komme foar it probleem mei de fergunningen. De fraksje ropt it kolleezje ek op om yn oparbeidzjen mei oare oerheden te wurkjen oan belied dat takomst biedt foar de fiskerijsektor oan it Waad en de bedriuwichheid deromhinne. Dat jout perspektyf foar de mienskip.

Taheakke: Skriftlike fragen FNP oer garnalefiskerij

---

Faaks ek nijsgjirrich

Mei-inoar nei de lânbou fan de takomst Ferromming slûs Koarnwertersân stap tichterby tanksij merkbydrage maritime sektor Help by hege enerzjyrekken doarpshuzen Súdwest-Fryslân Sjochtip: FryslânDOK ‘Is hjir noch wat te rêden?’ takom wykein Mear en langer stipe foar enerzjykoöperaasjes Gearwurkingsoerienkomst dyk- en dúnfersterking Skiermûntseach ûndertekene Organisaasje klear foar Agraryske Skôging 2023