Nij koroanaskaai wreidet fluch

In nij koroanaskaai, arcturus, wreidet him fluch oer de wrâld út. Troch Skaai XBB 1.16 nimt it tal ynfeksjes ta, mar it laat foarearst net ta mear slim sike minsken. Wol is der noed dat it tal minsken mei post-covid tanimt, seit firolooch Marion Koopmans. It skaai giet foaral yn Yndia en de Feriene Steaten om, mar is ek al yn Nederlân fûn.

Boarne: Unsplash

XBB1.16 wreidet him rap út, trochdat antystoffen dy’t troch faksinaasjes opwekke binne, minder goed tsjin de mutaasje beskermje. Dat is reden om wach te wêzen, mar laat foarearst net ta ekstra maatregels. Neffens in wurdfierder fan it RIVM is it nije skaai yn Nederlân noch net yn it rioelwetter fûn, mar wol by guon pasjinten yn sikehuzen. Sûnt it begjin fan de koroana-útbraak yn 2020 binne ferskillende skaaien fan de goarre ûntstien. Omikron kaam fan ein 2021 ôf it measte foar. Underwilens binne der ferskillende soarten fan omikron en dizze nije ferzje is der ien fan.

Firologe Koopmans seit dat der gjin oanwizingen binne dat minsken siker wurde fan de nije mutaasje. De klachten lykje net slimmer te wurden. Wol hat se noed dat it tal pasjinten mei post-covid tanimme kin. By dy sykte, dy’t ek wol long-covid neamd wurdt, hâlde pasjinten lang lêst fan koroanaklachten. Hoe’t de sykte ûntstiet, is noch net bekend. Dêr wurdt ûndersyk nei dien.

In Britske wittenskipper oppenearre in deimannich lyn dat de Britten yn it iepenbier ferfier wer mûlekapkes drage moatte soene. Mar dêr sjocht it RIVM gjin oanlieding ta.

---

Faaks ek nijsgjirrich

59,9% fan de Fryske pjutten giet net nei de toskedokter Fryslân op ien as it giet om kwaliteit fan libben