Doede Wiersma: De earste leafde

Oertinking

Oan de earste leafde tinke minsken faak mei nocht werom. It bliuwt harren by, hoe’t se foar it earst flinters yn it liif fielden en hielendal oer har toeren wiene. As yn in houlik de sleur komt, as partners ‘it boek út ha’ en ‘de wyn op is’, dan is de earste leafde fuort.
Faak hearde ik minsken sizzen dat se har by it belidenisdwaan bliid en entûsjast fielden: de earste leafde foar God, foar Jezus, foar de gemeente!

Lykas yn ús tsjerken fisitaasje hâlden wurdt, sa sjocht Johannes dat Jezus op besite by de gemeenten lâns giet. Hy nimt yn Him op wat goed en wat net goed rint. Johannes rapportearret dêr yn syn brieven en fisjoenen oan gemeenten oer. De earste gemeente is djip sakke. Dêr seit Jezus fan: “Dit haw Ik op dy tsjin, datsto net mear fan My hâldst lykas yn it earstoan.”
De earste leafde is bekuolle.
Fan oare gemeenten wurdt sein dat se dea, lau of op ’e doele binne. En in gemeente dy’t wol hoek holden hat, moat fêsthâlde wat se hat. Immen hat ris sein dat wy yn tsjerke sa waarm rinne foar twadde, tredde en fjirde saken, mar de earste en de wichtichste, nammentlik de idealen fan de hillige Geast, ferjitte. Wy soene alle gearkomsten fan tsjerkeried en kommisjes begjinne moatte mei it stellen fan prioriteiten. Wat is it wichtichste en wat kin wachtsje of is oerstallich?
Der wurdt op gearkomsten fan tsjerkerieden in soad tiid ferdien oan ynkommen stikken, oan it regeljen fan dingen, oan langtriedderich gepraat oer saken dy’t neat om ’e hakken ha.
Oant sân kear einigje de brieven fan Johannes mei de wurden:

“Dy’t earen hat, lit him/har hearre wat DE GEAST (de Ingel) tsjin de gemeente seit.”

As ús earste leafde bekuolle is, ha wy dan dy ynspiraasje fan de Geast net it aldermeast nedich?

Lêze: Iepenbiering 2:1-7

Mei tastimming oernommen út Wekker bliuwe, dat by de KFFB te bestellen is foar de ledepriis fan € 19,50. (boekeklub@kffb.nl, 06-5168 1577)

---

Faaks ek nijsgjirrich

Doede Wiersma: Wêrta is de ierde skepen? Doede Wiersma: It kwea is der Doede Wiersma: As ien dy’t frede bringt Doede Wiersma: Wat is in geef minske? Doede Wiersma: Oerdreaune soarch foar wat fuort is Doede Wiersma: It libben is as toulûken tusken goed en kwea Doede Wiersma: Acht opdrachten foar in kristen