Mei it FYK nei Eastenryk foar in evenemint foar jongelju fan Europeeske taalminderheden

In moaie kâns foar jongelju (16-30 jier) om te reizgjen en fan oare Europeeske taalmienskippen te learen

Fan 31 maart oant 6/7 april kinne jongelju mei nei Oberwart/Borta, Eastenryk foar in evenemint foar minsken fan sechstjin oant tritich jier dy’t diel útmeitsje fan Europeeske taalminderheden. Dan is der it Peaskekongres, organisearre troch YEN en “Hrvatski akademski klub” (HAK), de jongereinferiening foar Burgenlandkroäten yn Eastenryk.

Foto: pixabay.com

Aktiviteiten
De stêd is it thúsplak fan trije minderheden: de Burgenlandkroäten, de Hongaarske minderheid en de Roma-mienskip. Sadwaande hat it fjouwer nammen: Oberwart, Borta, Felsőőr en Erba. Op ekskurzje sille dielnimmers mear oer de Burgenlandkroäten leare. Yn de wike sille se foaral dwaande wêze mei it wurkatlier, dêr’t se diskusjearje sille oer tradysjes en wat it betsjut om jin part fan in taalminderheidsmienskip te fielen.

Op 6 april wurdt de algemiene ledegearkomste (general assembly) fan it YEN holden. Minsken dy’t dêr net oan meidogge, reizgje op 6 april nei hûs ta.

Kosten & oanmelde
Kosten om mei te dwaan foar de hiele wike (mei ynbegryp fan akkommodaasje, programma en iten) is € 100,-. By it FYK kin men nei mooglikheden freegje om finansjele stipe foar de reis te krijen. Alle ynformaasje is op ’e webside te finen. Oanmelde kin fia it FYK oant 11 maart.

FYK & YEN
It FYK, Frysk Ynternasjonaal Kontakt, jout de jongerein de mooglikheid om de grins oer te gean en jongelju fan oare taalminderheden te moetsjen. Sa kinne se harren kennis oer minderheden, kultuer, talen en polityk op in hiel aardige, aventoerlike manier ferbreedzje. De YEN, Youth of European Nationalities, is in koepelorgaan foar jongereinferienings fan Europeeske taalminderheden.

Fragen kinne oan de foarsitter steld wurde op foarsitter@fyk.frl.

---

Faaks ek nijsgjirrich

Nij Frysk berneboek ‘De Bjusterbaarlike Baron’ no al yn Dútsk Museum Tresoar is al 20 jier de skatkeamer fan Fryslân Denemarken organisearret 13e Liet Ynternasjonaal Universiteit Kiel moat fierder sykje om nije perfester Frysk Europeesk Hânfêst bestiet tritich jier: in jierdei mei in swart rantsje Moasje ferankerjen Frysk wittenskiplik ûnderwiis troch mearderheid 2e Keamer oannommen Ried fan Europa: aksje nedich foar Frysk yn rjochtbank en op universiteit