Deadskop T. rex bringt miljoenen op, mar folle minder as tocht
Resint ferskynd
In plasse fan in Tyrannosaurus rex is op in feiling yn New York ferkocht foar omrekkene 5,8 miljoen euro. Dat is in stik minder as earder rûze wie.
Tyrannosaurus rex (ôfbylding: Wikipedia/Charles Knight – publyk domein)
Feilinghûs Sotheby’s rekkene op in opbringst fan fjirtjin oant njoggentjin miljoen euro, foaral om’t it de earste kear wie dat in T. rex-deadskop feile waard en de plasse behoarlik folslein wie. Boppedat giene oare dinobonkerakken de lêste jierren foar rekôrprizen ûnder de hammer, lykas in gorgosaurus fan hast seis miljoen euro yn july.
In saakkundige seit tsjin The New York Times dat it betrouwen faaks út de merk ferdwûn is, trochdat koartlyn de feiling fan in T. rex-bonkerak yn Hongkong net trochgie. Dêr wie ûndúdlikens ûntstien oer hoefolle bonken echte fossilen wiene. De yn New York ferkochte deadskop, mei de bynamme Maximus, is net hielendal folslein. Neffens Sotheby’s is sa’n trijefearn fan de bonken orizjineel. De rest fan de plasse bestiet út ôfjitsels.
De deadskop waard yn 2020 en 2021 yn de Amerikaanske steat South Dakota bleatlein. De nei alle gedachten folwoeksen T. rex is dêr sa’n 67 miljoen jier lyn deagien.
Skriuw in reaksje
Gjin opmerkingen
Sjoch opmerkingen
Skriuw in reaksje
Der binne noch gjin opmerkingen, mar jo kinne de earste wêze
Skriuw in reaksje