Nije poëzijfilm fan Nyk de Vries, Dichter fan Fryslân: ‘Unwis’

novimber 8, 2021 09:57

Snein 7 novimber gie by Omrop Fryslân de poëzijfilm ‘Ongewis/Unwis’ yn premjêre, de lêste yn in rige fan sân koarte films dy’t Nyk de Vries as Dichter fan Fryslân makke, tegearre mei filmmakker Herman Zeilstra. De Ingelske oersetting is fan David Colmer.

De tekst ‘Unwis’ is ôfkomstich út De Vries syn nije bondel Asman, dy’t op woansdei 17 novimber presintearre wurdt yn de Doka fan it Folkshotel yn Amsterdam, mei ferskate optredens en gasten lykas Klaske Oenema, Sinan Cihangir en Dorien de Wit.

Sjoch op Facebook foar mear ynformaasje.

Op freed 12 novimber nimt De Vries ôfskie as Dichter fan Fryslân by Explore the North yn de Westertsjerke yn Ljouwert. By dy gelegenheid wurdt de nije Dichter fan Fryslân bekend makke en offisjeel beneamd.

Unwis

Ik sjoch it sa wer foar my: It pak
dûbeldrank op it nachtkastje, susters
hastich op ’e gong. Sechstjin jier lyn is
it dat se troch it MCL riden waard. Gjin
noasje noch fan gizelsoftware of
cyberkriminelen.

Se hie oare dingen oan ’e holle. In oare
fijân gizele har, kontrolearre har
systeem. In oare macht liet har
moannenlang hoopje en wachtsje, lake
om har ôfhinklikheid om úteinlik mei it
lêste ultimatum op te draven.

As se noch libbe hie, wat hie se fan ús
takomst fûn? Fan ’e hekken en muorren
dy’t we noadich ha om hackers, fan
watfoar soarte ek, bûtendoar te hâlden,
om ús frijheden te garandearjen?

De ûnwisse takomst hie har swier
oangriisd, tocht ik. Mar juster, ynienen,
hearde ik ús mem flústerjen:

It is it bêste en djoerste dat we hawwe.

Nyk de Vries | Dichter fan Fryslân

novimber 8, 2021 09:57
Skriuw in reaksje

Gjin opmerkingen

Noch gjin opmerkings

Der binne noch gjin opmerkingen, mar jo kinne de earste wêze

Skriuw in reaksje
Sjoch opmerkingen

Skriuw in reaksje

Jo mailadres wurdt net sichtber foar oare besikers fan dit webstee.
As der in stjerke by in hokje stiet, moatte jo dêr wat ynfiere.*

This site uses Akismet to reduce spam. Learn how your comment data is processed.