Sina stjoert earste frachtraket nei eigen romtestasjon

In Sineeske frachtraket is op wei nei it Sineeske romtestasjon yn oanbou Tiangong. De ûnbemanne raket, dy’t lansearre waard fan it eilân Hainan ôf, hat guod oan board dat nei oankomst automatysk nei it romtestasjon oerladen wurdt.

Makette fan de Tiangong 2 (foto: Wikipedia/Leebrandoncremer – CC BY-SA 4.0)

De kearnmodule fan it stasjon waard in moanne lyn yn in baan om ’e ierde brocht. Ein takom jier moat it romtestasjon Tiangong (Himelsk Paleis) klear wêze. Yn de tuskentiid stean der in protte ûnbemanne en bemanne flechten plend om de bou ôf te meitsjen en it stasjon yn gebrûk te nimmen.

It lansearjen fan de frachtraket, mei de namme Tianzhou (Himelsk Reau) 2, stie foar ôfrûne wike pland, mar waard fanwegen technyske problemen útsteld. No is alles goed gien, seit it Sineeske parseburo Xinhua.

Oan board binne foarrieden en brânje, foar de tarieding op de earste bemanne flecht nei Tiangong yn juny. Dan sille trije astronauten nei it romtestasjon foar in ferbliuw fan trije moanne. Yn ’e hjerst folgje trije nije astronauten. Tuskentroch wurdt noch in ûnbemanne frachtflecht útfierd.

De kearnmodule fan Tiangong moat noch mei twa gruttere ûndersyksmodules útwreide wurde. Dêrmei kriget Sina in folweardich romtestasjon, as lytsere tsjinhinger fan it ISS dat oan ’e ein fan syn libbensdjoer begjint te kommen.

---

Faaks ek nijsgjirrich

NASA-sonde berikt oerflak planetoïde op 333 miljoen km fan ierde Jûn spannende lâning fan rover Perseverance op Mars Sina komt mei nij koroanafaksin Earste flecht Marshelikopter útsteld nei technyske maleur Perseverance produsearret foar it earst soerstof op Mars Amerikaanske romtesonde fan planetoïde op wei gien nei ierde Ruslân stjoert filmploech nei ISS