Japanske miljardêr siket meireizgers foar moannemissy

De Japanske miljardêr Yusaku Maezawa wol acht bemanningsleden meinimme op de earste beminske moannemissy fan SpaceX yn 2023. Minsken mei ferskate eftergrûnen binne wolkom, seit Maezawa yn in fideo op syn webside. Hy ûnthjit alle kosten foar syn rekken te nimmen.

Foto: Wikipedia/SpaceX – publyk domein

SpaceX-topman Elon Musk makke yn 2018 buorkundich dat de Japanske ûndernimmer de earste moanneflecht mei Starship meitsje sil. Dat romtereau wurdt no ûntwikkele yn Teksas. Hoefolle Maezawa betelle hat foar de flecht is net bekend, mar neffens Musk giet it om “in slompe jild”.

Yn totaal sille tsien oant tolve minsken meigean op de flecht, tinkt Maezawa. De oprop jildt mar foar acht plakken oan board. Belangstellenden moatte oan twa kritearia foldwaan: hja moatte de romteflecht brûke om harren eigen wurkterrein en de hiele maatskippij foarút te helpen, en hja moatte oare bemanningsleden mei deselde beweechredenen stypje.

Woansdei die SpaceX noch in test mei prototype SN10. De raket eksplodearre lykwols nei de lâning. By testen mei SN8 en SN9 earder kaam de raket mear as tsien kilometer heech, mar gie it ek mis by de lâning. De romtereauwen kamen troch ferskate oarsaken ferkeard del en ûntploften.

---

Faaks ek nijsgjirrich

Europeeske Kommisje: Ljouwert tige ynnovatyf, mar net Capital of Innovation 2020 Twa jier nei kontenerramp noch hieltyd 800.000 kilo ôffal yn see Raket fan Boeing 747 ôf lansearre ESA siket nije astronauten, froulju tige wolkom