Streektalen en Tsead Bruinja op Europeeske Taledei

Op de Europeeske Taledei, sneon 26 septimber, sille de streektalen fan Nederlân te hearren wêze by de meartalige fiering mei Dichter des Vaderlands Tsead Bruinja, Grinslanner dichteresse Fieke Gosselaar, Biltske muzikant Jan de Vries, en Liesbeth Terpstra mei in presentaasje fan Nijntje yn it Frjentsjerters.

Tsead Bruinja (foto: Wikipedia/Goesseln – CC BY-SA 3.0)

Europeeske Taledei wurdt sûnt 2001 alle jierren fierd en stiet yn it teken fan meartaligens en taallearen. Der binne mear as 200 Europeeske talen en dêrfan binne njonken de offisjele talen likernôch 80 talen erkend fan mear as 200 minderheidsgroepen, lykas it Frysk, it Sorbysk, of it Dútsk dat fan Armenië oant Denemarken yn ferskate lannen erkend is. Yn Nederlân is der ek in soad taalferskaat en op 26 septimber wurdt dêr omtinken oan jûn mei poëzy en muzyk.

Sa sil Tsead Bruinja fertelle oer syn blomlêzing fan poëzy yn de Nederlânske streektalen en klinke it Grinslannersk, it Biltsk en it Frjentsjertersk mei Fieke Gosselaar, Jan de Vries en Liesbeth Terpstra. Dat sil wêze op sneon 26 septimber om 11.00 by gemeente Waadhoeke, dy’t as meartalige gemeente de Europeeske Taledei ek fiert mei in eigen program.

Fanwegen de feilichheid is der plak foar in beheind tal minsken en is oanmelding nedich. De fiering wurdt lykwols ek digitaal live útstjoerd fia Waadhoeke. It evenemint foar Europeeske Taledei wurdt organisearre troch it Europeesk Buro foar Lytse Talen (EBLT) en Mercator Europeesk Kennissintrum/Fryske Akademy, yn gearwurking mei gemeente Waadhoeke en City of Literature Ljouwert.

---

Faaks ek nijsgjirrich

Dingtiid: Fryslân moat lykas Galisië in kultuerried krije Underwiisfernijing yn Yndia giet op kosten fan it Hindy ‘Fear yn ’e broek’ foar trije skoallen op It Hearrenfean Fryske Akademy sil wrâldboargers opliede Fryske Beweging trunet provinsje oan om simmerskoallen Frysk mooglik te meitsjen Mear Frysk op Noard-Fryske skoallen Alle fraksjes Fryske Steaten foar moasje minderheidstalen