Opskuor om Frysk jeugdboek oer homoseksualiteit

febrewaris 3, 2019 22:33

Alde tiden komme werom: yn de jierren sechtich ûntstie opskuor om de boeken fan Anne Wadman en Trinus Riemersma. Wylst seks yn ‘e Nederlânsktalige literatuer doe al ynboargere wie, hearde soks neffens de Fryske lêzers net yn Fryske boeken thús. No stiet it Frysktalige boek Sex to the Max fan Bart Kingma ynienen yn it middelpunt fan ‘e belangstelling fanwegen de seksuele ynhâld.

Bart Kingma hat Sex to the Max skreaun yn it ramt fan in lêsbefoarderingsprojekt, dêr’t ek Omrop Fryslân oan meidocht. It is ornearre foar bern yn ‘e leechste klassen fan it fuortset ûnderwiis. Hja krije in Frysk boek en Omrop Fryslân makket dêr filmkes by. Sex to the Max giet oer de fyftjinjierrige Max Wouda, dy’t derachter komt dat er mear op jonges falt as op famkes.

Twa skoallen hawwe it boek, dat útjûn is troch de Afûk, weromstjoerd. Hja woene it net hawwe, om’t de ynhâld “te heftich” wie, sa docht de Ljouwerter Krante te witten. Oare skoallen brûke it boek ek net of just by âldere bern.

De skriuwer is net sa wiis mei de hannelswize fan de skoallen. Hy seit: “Ut ûndersyk docht bliken dat krekt tolve-, trettjinjierrigen seksualiteit ûntdekke. It boek is net plat. It sjocht mei in romme blik nei de problematyk.” De útjouwer docht te witten dat er de geskiktens fan de tematyk yn it foar mei GGZ Fryslân ôfstimd hat.

Foar wa’t nijsgjirrich is nei it boek: in foarlêzen ferzje stiet hjirûnder:

febrewaris 3, 2019 22:33
Skriuw in reaksje

1 opmerking

  1. Faber febrewaris 9, 19:06

    Wêrom te heftich? Bern fan de leechste klassen fan it fûortset ûnderwiis witte omers allang wat seksualiteit is. Dat witte se yn groep 8 ek al at de bern fan no net sa folle oars binne as yn de jierren 2000. Ik haw it boek yn de link belústere en it liket my just tige geskikt ta en is, yn myn eagen, ek nea te eksplisiet of “heftich”. It is seker gjin pornografy! At de bern noch te jong binne en gjin ynteresse foar it thema hawwe, sille se it boek ek net útsykje, liket my sa ta. It thema, ûntdekken fan de eigen seksualiteit (en net sasear homo-wêzen, de haadpersoan liket my mear biseksueel dan homoseksueel) is in hiel aktueel thema en it is ek in hiel belangryk ûnderdiel fan dy fase fan je libben. Boeken wêrút blykt dat je jesels ûntdekke moatte yn je eigen tempo yn in feilige omjouwing binne tink ik in moai foarbyld foar it ideaal sa’t it hjoeddedei jildt.

    Spoiler alert: Wat ik wol kwyt wol oer it boek, is dat it my tsjinstiet dat de fraach wêrom’t de haadpersoan op syn skoaltrip stjert, net beantwurde wurdt. Út de rest fan it boek komt hy op my oer as ien dyt hiel goed wit hoe’t er yn it libben stiet en dy’t him net opjeije lit. Syn freonen en hy binne oan ‘e ein fan it ferhaal wer nei elkoar ta groeit en der blyke út syn bryfkes gjin driigjende problemen. Al mei al fyn ik it núver dat hy samar oan syn ein komt. It liket in sprong fan de skriuwer om op dizze wize yn dizze foarm syn ferhaal skriuwe te kinnen yn plak fan dat it yn it ferhaal passet. It liket no krekt in Carry Slee ferhaal en dat fyn ik persoanlik jammer.

Sjoch opmerkingen

Skriuw in reaksje

Jo mailadres wurdt net sichtber foar oare besikers fan dit webstee.
As der in stjerke by in hokje stiet, moatte jo dêr wat ynfiere.*

This site uses Akismet to reduce spam. Learn how your comment data is processed.