Tafel 18 siket de bêste amateurkok fan Fryslân

juny 30, 2015 08:00 Fernijd

Wa makket it lekkerste iten mei Fryske produkten en is eins syn karriêre as sjef-kok misrûn? Omrop Fryslân sil yn it nije televyzjeprogramma Tafel 18 op syk nei de bêste amateurkok fan Fryslân. Dielnimmers kinne harren ynskriuwe oant 22 augustus fia www.omropfryslan.nl/tafel18. De opnamen begjinne yn septimber en de presintaasje leit yn hannen fan Miranda Werkman.

In faksjuery bepaalt tegearre mei it publyk yn seis ôfleverings wa’t de bêste amateurkok fan Fryslân is. Yn Tafel 18 draait it net allinnich om itensieden, it draait ek om streekeigen produkten. De dielnimmers wurde útdage om mei yngrediïnten út ús eigen regio nije ferrassende gerjochten op tafel te toverjen. Op dy wize wol it programma mei bygelyks it Koudumer Beantsje, it Wâldgieltsje of Laaksumer Bot ek nije smaakkombinaasjes ûntwikkelje.

De dielnimmers krije yn de televyzjesearje ferskate opdrachten fan de faksjuery. De iene kear giet it om it meitsjen fan in bittergarnituer, de oare kear om in haadgerjocht of in trijegongenmenu. Dêrneist krije de dielnimmers tips oer hoe’t sy de gerjochten it bêste optsjinje en presintearje kinne. Sy krije de kâns om yn de keuken te sjen by Fryske topkoks.

Tafel 18 wurdt fan oktober ôf útstjoerd op Omrop Fryslân Televyzje. Yn septimber binne der al ‘foarpriuwkes’ yn de programma’s Hea! en Bynt en op Omrop Fryslân Radio. De syktocht nei de bêste Fryske amateurkok is ek te folgjen op Facebook en www.omropfryslan.nl/tafel18.

juny 30, 2015 08:00 Fernijd
Skriuw in reaksje

Gjin opmerkingen

Noch gjin opmerkings

Der binne noch gjin opmerkingen, mar jo kinne de earste wêze

Skriuw in reaksje
Sjoch opmerkingen

Skriuw in reaksje

Jo mailadres wurdt net sichtber foar oare besikers fan dit webstee.
As der in stjerke by in hokje stiet, moatte jo dêr wat ynfiere.*

This site uses Akismet to reduce spam. Learn how your comment data is processed.