Wa is de mysterieuze NachtRider?

septimber 12, 2011 19:58

“De NachtRider is altyd op paad …” Oft dat in ûnthjit is of in drigemint, is net alhiel dúdlik. De NachtRider is in nije Frysktalige blogger, dy’t sûnt ôfrûne tongersdei oer Fryske literatuer skriuwt en ek op Facebook warber is. De NachtRider fertoant him dêr mei in plaatsje fan in autolampe (sjoch hjirneist), dy’t yn ‘e fierte wat tinken docht oan de koplampen fan KITT, de auto fan KnightRider, de televyzjeheld út de jierren ’80 dy’t oantsjut waard as “a man who does not exist”.

Wa’t de NachtRider is? Wy fan It Nijs hawwe gjin flau idee. Wy witte al dat er/se goed thús is yn de Fryske literatuer en polityk. Yn syn/har lêste bydrage is de NachtRider tige kritysk oer it literatuerbelied fan deputearre Jannewietske de Vries. Neffens de blogger “wurdt grute dat Jannewietske de Vries sà alderôfgryslikst benaud is foar de heafoarken fan It Skriuwersboun, dat sy net reewillich is en meitsje dit jier op ’e nij de reis nei de kâlde Broeretsjerke, dy mei it lekkende dak. ”

De foto fan de NachtRider hawwe wy pleatst sûnder syn/har tastimming. Wy witte ommers net wa’t it is. As de NachtRider dat ferfelend fynt, dan moat er/se efkes kontakt mei ús opnimme, dan helje wy him sa gau mooglik fuort.

Klik hjir foar it weblog fan de NachtRider.

septimber 12, 2011 19:58
Skriuw in reaksje

5 opmerkingen

  1. Cornelis van der Wal septimber 12, 22:27

    Literêr tydskrift http://www.ensafh.nl hat de nije blogger daliks al ûntmaskere: it is Abe de Vries.

  2. Erwin2.0 septimber 12, 23:04

    Haha, geweldich soks!

  3. pizza boy septimber 12, 23:11

    Ik tink dot Jannewietske de Vries het sels hat skrieuwen.

  4. de NachtRider septimber 13, 02:31

    Der wurdt grute, de NachtRider soe in projekt fan ien auteur wêze. Dat is in fersin, de NachtRider hat mear as ien bestjoerder. Wa’t dat binne, docht net ta de saak. De saak is, de NachtRider is op paad…

  5. Koos Tiemersma septimber 15, 17:13

    Ik soe it ris sykje yn it brûsende nachtlibben op It Hearrenfean…

Sjoch opmerkingen

Skriuw in reaksje

Jo mailadres wurdt net sichtber foar oare besikers fan dit webstee.
As der in stjerke by in hokje stiet, moatte jo dêr wat ynfiere.*

This site uses Akismet to reduce spam. Learn how your comment data is processed.