Bastards winner Stellingwarfpop

novimber 24, 2009 06:55

Et dadde Stellingwarver popfestival Stellingwarfpop 2009 is een groot sukses wodden. Veur de eerste keer was et festival, dat orgeniseerd wodde deur de Stellingwarver Schrieversronte, binnen in et jeugd- en meziekcentrum M!X in Wolvege. Van begin tot aende was d’r een geweldige sfeer in en bi’j de meer as geschikte zael van dit centrum.

Winner wodde de groep Desiré and the Bastards, twiede de band Marius en dadde Sound of Parka. Sound of Parka zorgde as laeste dielnemer veur een optreden dat ston as een huus, zodat de band meerdere toegiften geven mos. De band Marius kwam mit een iezerstark lied, waor de muzikaoliteit op alle menieren van ofstraolt, mar ok de perfekte zang van disse groep uut Wolvege opvaalt. Desiré and the Bastards wunnen de eerste pries mit een geweldig optreden, waor niet alliend zangeres Desiré Dooper veur zorgde mar ok de bassist, gitarist en drummer. Opmarkelik is de leeftied van de leden: de zangeres – zi’j gaot bi’jkotten een opleiding volgen an de rockakedemie in Tilburg – is 17 jaor, en dat gelt ok veur de bassist. De gitarist is nog mar 14 en de drummer alderdeegst 12 jaor oold. De jury was daor ok van onder de indrok, mar dit gegeven gaf niet de deurslag: mit naeme de prima eigen Stellingwarver tekst, de muzikaole kaante, de strakke uutvoering en de goeie prissentaosie deden dat wel.

De jury hadde liekewel veur alle ere bands ok goeie woorden, mit naeme et optreden van Carolien Hunneman, diels bi’jstaon deur een violist, vul arg op.De prissentaosie van Stellingwarfpop was in goeie hanen van Coen Speelman uut Grunningen, hi’j is o.e. drummer bi’j de band A Liquid Landscape. De jury bestaon uut Jan Oosterhof van Steggerde, Robert van Dam uut Grunningen en Boelie Winter van Wolvege. As vierde stemme in de jury was et pebliek vraogd om stemformelieren in te vullen. Dat was veur et eerst bi’j Stellingwarfpop en dat het iederiene ommeraek goed voldaon. Opvalend was dat et pebliek tot dezelde konklusie kwam as de drie juryleden.

Veur et locht en geluud zorgden as altied Harry Hof en Cees Pols van Thij-studio’s uut Tuk. Laestnuumde zorgde eerder ok veur de opnaemen van alle Stellingwarver nommers, die zaoterdag in een kleine oplaoge op een cd verschenen binnen. Stellingwarfpop 2009 wodde ofsleuten mit een prachtig optreden van de winner van veurig jaor Ex-Aequo.

Bi’jkotten zit de warkgroep Stellingwarfpop al weer om de taofel om mit de eerste veurbereidings van Stellingwarfpop 2010 an de slag te gaon. Weerommekiekende op oflopen 21 november het de warkgroep, die dit keer beston uut Bernard Damhuis, Léon van Lier, Piet Tjassing en Sietske Bloemhoff, daor alle reden toe!

Stellingwarfpop 2009 wodde financieel meugelik maekt deur Rabobaank de Stellingwerven, Woonboulevard Home Center, de gemienten Oost- en West-Stellingwarf, et Nederlands Fonds voor Podiumkunsten, Popnet, Friesland Pop, Grand-Café De Burgemeester, Jeugd- en muziekcentrum M!X en de Stellingwarver Schrieversronte.

novimber 24, 2009 06:55
Skriuw in reaksje

Gjin opmerkingen

Noch gjin opmerkings

Der binne noch gjin opmerkingen, mar jo kinne de earste wêze

Skriuw in reaksje
Sjoch opmerkingen

Skriuw in reaksje

Jo mailadres wurdt net sichtber foar oare besikers fan dit webstee.
As der in stjerke by in hokje stiet, moatte jo dêr wat ynfiere.*

This site uses Akismet to reduce spam. Learn how your comment data is processed.