Stellingwarven betrekken stellings

oktober 31, 2009 10:35

Berkoop. Op donderdagaovend 19 november orgeniseert de Stellingwarver Schrieversronte in et kader van Stellingwarf 700 de lezing Ni’je stellings betrekken deur de Stellingwarven die verzorgd wodden zal deur Hans van Borselen uut De Fochtel. De heer Van Borselen is publicist op verschillende terreinen. Zo publiceerde hi’j bi’jglieks in 1997 et essay Van Werven naor Verworven, een zuuktocht naor et kenmarkende van de Stellingwarven, doe en now. Twie jaor laeter hul hi’j een lezing mit as titel De politieke en sociaal-economische identiteit der Stellingwerven in historisch perspectief.

Pesisie tael, literetuur en kultuur
Van Borselen zal ingaon op de gevolgen van de gezaemelike geschiedenis van de Stellingwarven in de boererepubliek tussen 1300 en 1500 veur et sociaole en kulturele kerakter van beide gemienten vandaege-de-dag. An de odder zullen de al dan niet kenmarkende verschillen kommen van doe en now van de beide Stellingwarven. In dat verbaand wodt ok de pesisie an de odder steld van de Stellingwarver tael, literetuur en kultuur in de tegenwoordige saemenleving in dit gebied. Et gaot hierbi’j mit naeme om de identiteit van de gemienschoppelike kultuur, de antrekkelikhied van de tael, de geveren die de tael bedreigen en de vraoge as de streekkultuur langer bestaon zal as de streektael.

Fusie Stellingwarver gemienten?
Van Borselen zal ok uutvoerig ommedaenken hebben veur de ekenomische en sociaole ontwikkelings in beide gemienten, die zoas bekend gien ekenomische kernzones in de perveensie binnen. Wat bin de prioriteiten op die gebieden veur de kommende tied? Gaot de saemenwarking tussen beide gemienten zoveer dat d’r over niet te lange tied spraoke wezen zal van een fusie? En zal de streekkultuur opneumen wodden in et gezaemelik beleid van beide gemienten of wodt et een bi’jzaeke?
Kotomme: een lezing over et verleden, et heden en veural over de toekomst van de beide Stellingwarven: ni’je stellings betrekken.

De aovend wodt holen in et gebouw van de Schrieversronte in Berkoop. I.v.m. et tal plakken moej’ je van teveuren wel even anmellen. Dat kan via de mail info@stellingwarfs.nl, bellen kan ok naor 0516-451108. De toegang is ommenocht.

oktober 31, 2009 10:35
Skriuw in reaksje

Gjin opmerkingen

Noch gjin opmerkings

Der binne noch gjin opmerkingen, mar jo kinne de earste wêze

Skriuw in reaksje
Sjoch opmerkingen

Skriuw in reaksje

Jo mailadres wurdt net sichtber foar oare besikers fan dit webstee.
As der in stjerke by in hokje stiet, moatte jo dêr wat ynfiere.*

This site uses Akismet to reduce spam. Learn how your comment data is processed.