Fraachpetear mei Berlusconi
Resint ferskynd
De Italiaanske premier Berlusconi hâldt net fan syn wurk. Dat sei er yn in fraachpetear mei CNN. Berlusconi hat de ôfrûne jierren wat nuvere útspraken dien, benammen nei oare politisy ta. Sels seit er dat er in iepen en oprjochte persoanlikheid is. De media hat in protte skreaun oer Berlusconi, mar neffens him is de helte dêrfan optocht. Op feesten ferskynde er de ôfrûne jierren gauris mei kreaze jonge fammen, de media skreau dat it mei de presintaasje fan syn persoanlikheid te krijen hie, mar neffens Berlusconi ha dy fammen gjin sint fan him krigen. Berlusconi is de langstsittende premier fan Italië. Hy waard yn 2008 foar in tredde amtstermyn keazen. De folgjende Italiaanske ferkiezings binne yn 2013. Neist syn kariêre as politikus is er de besitter fan de fuotbalklup AC Milan en is de eigner fan ferskate kranten, radio- en televyzjestjoerders. Berlusconi sei tsjin CNN dat er yn 1994 de polityk yn gie, om dêr tsjin de Linkse macht en de ‘kommunistyske ideology’ yn Italië te striden. De 74-jierrige politikus seit dat er it amt as in plicht foar syn lân sjocht, en dat oare minsken goed oer him tinke.
It Nijs jout in pear sitaten:
Oer himsels
”Ut leafde foar Italië, ik fielde dat ik it fan de Linkse polityk rêde moast.”
”De bêste politike lieder yn Europa en fan de wrâld.”
Oan ‘e ein fan it Italiaanske foarsitterskip fan de EU, by in gearkomste yn Brussel
”Lit ús oer fuotbal en froulju prate.” (sjocht nei Gerhard Schröder, dy’t fjouwer kear troud wie.) ”Gerhard, begjin do mar.”
Oer Mussolini
”Mussolini hat gjin ien deadien. Hy stjoerde de minsken yntern mei ballingskipsfakânsje.”
Oer Obama
”Hy is jong, kreas, en hat in kleurke.”
Tsjin in Dútsk lid fan it Europeesk Parlemint
”Yn Italië wurdt in film makke oer in Nazi-konsintraasjekamp. Ik sil freegje oft se dy de rol fan Kapo jaan kinne (in finzene dy’t fan de Dútsers kampwacht wurde mocht en dêrmei privileezjes krige), do soest it hiel goed dwaan.”
Kampanje 2006
”Ik bin de Jezus Kristus fan de polityk. Ik bin in geduldich slachtoffer, ik help elkenien, en ik offerje mysels foar elkenien op.”
”Lês it swarte boek fan it kommunisme en do silst sjen dat se yn it Sina fan Mao gjin bern ieten mar seaen, om se dêrnei as dong op it lân te brûken.”
Skriuw in reaksje
Gjin opmerkingen
Sjoch opmerkingen
Skriuw in reaksje
Der binne noch gjin opmerkingen, mar jo kinne de earste wêze
Skriuw in reaksje